Estaleiro no 1º Foro Social Galego, porque uma outra Galiza é possível

Sob o lema Criar e construir alternativas desde Galiza, desenvolveu-se em Compostela o primeiro encontro dos movimentos sociais galegos, no passado dia 6 de Dezembro. Convidados polo C.S. Madia Leva, Estaleiro teve a oportunidade de difundir o seu projecto no “Espaço de Comunicaçom”. A essa mesma hora estavam-se a realizar três interesantíssimas mesas redondas nas salas adjacentes. No ambiente dos três dias do foro respiravam-se aquelas palavras de Castelao no álbum Nós de 1931 há sítio para todxs.

Isaac Lourido foi o encarregado de falar da editora. Na sua intervenção foi sinalando os pontos fundacionais do colectivo.  Em primeiro lugar falou da libertação e democratização da cultura e isto ligou-o com o copyleft e as licenças Creative Commons ao questionarem a propriedade privada, neste caso a intelectual. Também sublinhou a defesa do galego e, portanto, da liberdade normativa. Sem esquecer, a importância da criaçao e difusão de pensamento crítico e, como prova material de todo isto, Carlos Diegues apresentou a Revolução pendente. Democracia e feminismo. Mais uma vez o autor salientou o feminismo como ideal emancipatório radical e a centralidade que o reconhecimento da identidade deve adquirir na praxe política.

Imagens da apresentação do Clube de Leitura Virtual Universitário da Eurorregião

Publicamos agora alguma das fotografias da apresentação do Clube de Leitura Virtual Universitário da Eurorregião organizado pola Fundación do Centro de Estudos Eurorrexionais, no passado 27 de Novembro,  no IES Xelmirez I de Compostela.

As imagens pertencem à apresentação institucional por parte de D. Manuel Miguel López Mejuto (director do Instituto Xelmírez I), Senén Barro (presidente da Fundação CEER), Carlos Ferrás (director da Fundação CEER) e Samuel Rego (responsável do Instituto Camões em Vigo) e ao debate sobre as peças de teatro Fume / Insomnio, editadas por Estaleiro Editora. No debate participaram os autores, Carlos Losada e Rubén Ruibal, Pilar Reino (coordinadora do Departamento de Normalização do Instituto Xelmírez I), Rosario Álvarez  (Catedrática do Departamento de Galego da USC), Carlos Figueiras (em representação de Estaleiro Editora) e uma aluna membro do Clube de Leitura do centro.

Fume/ Insomnio escollido polo clube de lectura virtual eurorrexional

A continuación, reproducimos o programa do acto de presentación deste clube de lectura, que vem de escoller a segunda publicación de Estaleiro Editora para comezar a súa actividade:

Acto de presentación do Club de Lectura Virtual

A Fundación do Centro de Estudos Eurorrexionais presentará públicamente o Club de Lectura Virtual Universitario da Eurorrexión. Este evento terá lugar o vindeiro xoves 27 de novembro as 12:30 h. no IES Xelmirez II sito na rúa Poza do Bar s/n en Compostela.

O programa da actividade será o seguinte:

- 12:30. Presentación institucional por parte da dirección do Instituto Xelmírez I, D. Manuel Miguel López Mejuto; presidente da Fundación CEER, D. Senén Barro; dirección Fundación CEER, D. Carlos Ferrás; responsable do Instituto Camoes en Vigo; D. Samuel Rego.

- 13:00. Performance realizada por Espazo de Danza da USC. Espazo de Danza Universitario da Vicerreitoría de Cultura da USC

Dirección: Xoan Carlos Zahera

Bailan: Alumnas do curso de Danza Contemporánea

Amosan unha improvisación coreografiada, é un traballo do laboratorio

de danza contemporánea e experimental.

(entendo que debemos agradecerlle a Vicerreitoria de Cultura a presenza do Espazo de Danza)

- 13:10. Debate da obra de teatro Fume/ Insomnio por parte dos autores Carlos Losada e Ruben Ruibal (Premio Nacional Español de Obra Dramática do 2007). Esta mesa de debate literario estará moderada por Dna. Pilar Reino, coordinadora do Departamento de Normalización do Instituto Xelmírez I, acompañada pola catedrática da Universidade de Santiago de Compostela, Dna. Rosario Álvarez Blanco, o portavoz da Editorial Estaleiro Editora, D. Carlos González Figueiras e un membro do alumnado do Instituto Xelmírez I, participante no Club de Lectura deste centro.

- 14:00. Clausura e peche do evento.

Estaleiro Editora no Gomes Gaioso

No próximo sábado 22, Estaleiro Editora apresentará o seu projecto editorial às 20:00 h no Centro Social Gomes Gaioso da Corunha; Rua Marconi, 9 rés-do-chao [Atochas-Monte Alto].

No acto exporá-se a ideia geral do projecto e também se fará umha achega aos materiais já editados pola editora.

Estaleiro Editora estivo presente na Casa das Atochas

Estaleiro Editora estivo presente na Casa das Atochas, A Corunha, o 18 de Junho de 2008. Tratava-se dumha palestra inscrita nunhas jornadas organizadas pola Casa das Atochas, centro social corunhês sobre (ou “para”) a cultura livre. Parecia portanto umha ocasiom propícia para explicar o nosso projecto alternativo de ediçom em galego e na Galiza. E assim foi. Na Casa das Atochas encontramos pessoas que condiziam com o nosso jeito libertário de entender a cultura, isto é, nom como produçom ou consumo senom como comunicaçom.

Na noite do 18 de Junho falou-se um pouco em todo. Começou-se com umha breve exposiçom do percorrido vital da editora e depois houvo tempo para perguntas, para dialogarmos. Numha hora e meia houvo pois perguntas e muita curiosidade. Por exemplo, ali me perguntárom cousas como “É viável o projecto?” “Como trabalhades?” “Como se tomam as decisons em Estaleiro?” ou “Que posicionamento há a respeito dos direitos de autor ou autora?”. De facto, o copyleft foi o que deu pé a um maior debate; em qualquer caso, o diálogo foi fluido e agradável foi também ver o interesse e o conhecimento que do copyleft tinha boa parte do auditório. Ao acabar, o diálogo deixou-me um bom sabor de boca e, com certeza, vontade de voltar à Casa das Atochas com mais e novos livros para lhes mostrar que Estaleiro Editora é um projecto vivo, dinâmico e aberto a toda pessoa interessada por umha cultura livre, crítica e em galego.