Lanzamento de Fume e Insomnio

Para lembrar a estrea da colección de teatro de Estaleiro Editora, publicamos agora o comunicado de prensa do acto e algunha das fotografías do evento celebrado o 26 de xuño na Biblioteca Pública Ánxel Casal:

Gabinete de comunicación de Estaleiro Editora

Comunicado de Prensa

Estaleiro Editora inaugura a súa colección de teatro coas pezas

Fume e Insomnio de Rubén Ruibal e Carlos Losada

O próximo venres día 26 de xuño, ás 18:00 hh., Estaleiro Editora presentará, na biblioteca pública Ánxel Casal de Compostela o primeiro libro da súa colección de teatro, en que se editan as pezas Insomnio de Rubén Ruibal e Fume, de autoría conxunta de Carlos Losada e o propio Rubén Ruibal. A editora libre galega inaugura así esta nova colección, coa que pretende explorar novas vías de difusión para o noso teatro, xénero habitualmente desatendido e minorizado no sistema editorial galego .

O acto estará protagonizado polos autores, que alén de presentar os seus traballos contarán coa colaboración de Nacho Castaño, actor que xa participou na montaxe da obra Fume da compañía tetro Cachuzo, para a interpretación de unha lectura dramatizada dos textos. Ademais, intervirán Roi Vidal, un dos especialistas en teatro que integran Estaleiro, e Carlos Figueiras, portavoz da editora.

Actores e fundadores da compañía Teatro Cachuzo, os autores contan cunha ampla traxectoria no sistema teatral galego. Rubén Ruibal (Ribadeo 1970) foi gañador do premio Álvaro Cunqueiro 2006 con Limpeza de sangue (o sangue fai ruído), editado por Edicións Xerais de Galicia en 2007 e Premio Nacional de Literatura Dramática, que premia anualmente o mellor libro de teatro editado en calquera das linguas do Estado español. Carlos Losada (Cambados 1966) foi gañador do premio Manuel María de literatura dramática infantil (concedido polo Igaem) pola súa obra Game Over (Xerais 2007).

Estaleiro Editora, o selo galego da edición independente, presenta neste acto o primeiro libro da súa colección de teatro. A editora pretende coa apertura desta nova liña de publicación, afondar na súa configuración como alternativa ao circuíto oficial da literatura e do pensamento subsidiados, de que tanto vén dependendo o teatro galego e ten como obxectivo a creación dun espazo de liberdade para a dinamización cultural á marxe das institucións oficiais.

Este novo produto cultural de Estaleiro Editora, ao igual que Plan de Fuga e todos os títulos futuros, colocarase no web, www.estaleiroeditora.com, para descarga libre e gratuíta.

O Estaleiro confirma con esta edición a súa vontade de traballo regular e continúa coa distribución propia e os prezos reducidos (6 € para Fume / Insomnio), como non podería ser de outra maneira para esta plataforma de edición sen ánimo de lucro.

Despois do éxito da presentación de Plan de Fuga, á que asistiron por volta do centenar de persoas, e do bo ritmo das vendas dese primeiro libro, Estaleiro Editora só pode agradecer a todo o seu público o seu apoio e convidalo a gozar deste novo acto.

Atentamente, saúdos:

Gabinete de comunicación de Estaleiro Editora

Estaleiro Editora estivo presente na Casa das Atochas

Estaleiro Editora estivo presente na Casa das Atochas, A Corunha, o 18 de Junho de 2008. Tratava-se dumha palestra inscrita nunhas jornadas organizadas pola Casa das Atochas, centro social corunhês sobre (ou “para”) a cultura livre. Parecia portanto umha ocasiom propícia para explicar o nosso projecto alternativo de ediçom em galego e na Galiza. E assim foi. Na Casa das Atochas encontramos pessoas que condiziam com o nosso jeito libertário de entender a cultura, isto é, nom como produçom ou consumo senom como comunicaçom.

Na noite do 18 de Junho falou-se um pouco em todo. Começou-se com umha breve exposiçom do percorrido vital da editora e depois houvo tempo para perguntas, para dialogarmos. Numha hora e meia houvo pois perguntas e muita curiosidade. Por exemplo, ali me perguntárom cousas como “É viável o projecto?” “Como trabalhades?” “Como se tomam as decisons em Estaleiro?” ou “Que posicionamento há a respeito dos direitos de autor ou autora?”. De facto, o copyleft foi o que deu pé a um maior debate; em qualquer caso, o diálogo foi fluido e agradável foi também ver o interesse e o conhecimento que do copyleft tinha boa parte do auditório. Ao acabar, o diálogo deixou-me um bom sabor de boca e, com certeza, vontade de voltar à Casa das Atochas com mais e novos livros para lhes mostrar que Estaleiro Editora é um projecto vivo, dinâmico e aberto a toda pessoa interessada por umha cultura livre, crítica e em galego.